काठमाडौं । कतारका अमिर (राजा) शेख तमिम बिन हमाद अल थानीको नेपाल भ्रमणलाई लक्षित गरी राजधानी काठमाडौंको सुरक्षा व्यवस्थामा कडाई गरिएको छ ।
भ्रमणकाे अघिल्लो दिनदेखि नै सुरक्षाका लागि गुप्तचर निकायका सुरक्षाकर्मी खटाइसकिएकाे छ भने सेना सुरक्षा दिने तयारीमा छ । काठमाडाैं भित्र र बाहिरबाट काठमाडाैं आउने सवारीसाधनलाई नियन्त्रणमा लिएर डाइभर्ट गर्ने सम्मकाे तयारी छ ।
नेपालमा कतारी सुरक्षा निकायकाे टोलीले निगरानी थालिसकेकाे छ । सादा पोशाकमा परिचालित भएको कतारी सुरक्षा समूह अहिले काठमाडाैंकाे सुरक्षा निगरानीमा व्यस्त छ । गृह मन्त्रालय स्रोतले बताएको छ । भ्रमणपूर्व नै तयारीका लागि ५० भन्दा बढी कतारी प्रतिनिधि काठमाडौं आइसकेका छन् ।
दुई निजी जहाज लिएर पहिलोपल्ट नेपाल आउँदै गरेका कतारका राजाकाे सुरक्षामा सरकारले कडा सुरक्षा प्रवन्धकाे तयारी गरेकाे हाे । कतारी राजासँगै उनका साथमा आधा दर्जनभन्दा बढी मन्त्री नेपाल आउँदैछन्।
मङ्गलबार उनीहरूकाे सुरक्षाका लागि सेनासहित प्रहरीलगायत सुरक्षाकर्मीले कडा पहरेदार दिने भएका हुन् ।
कतारी राजा दुईदिने भ्रमणका लागि मङ्गलबार नेपाल आउँदैछन् । सरकारले उनको सम्मानमा एक दिन सार्वजनिक बिदा दिएकाे छ ।
कतारी राजाकाे सुरक्षाका लागि करिब १० हजार सुरक्षाकर्मी काठमाडौंमा परिचालन गरिने गृहमन्त्रालयले जनाएकाे छ ।
सडकमा सशस्त्र प्रहरी, नेपाल प्रहरी र अनुसन्धान विभागको टोली परिचालन हुनेछन् । पहिलो घेरामा नेपाल प्रहरी, दोस्रो घेरामा सशस्त्र प्रहरी र तेस्रो घेरामा नपाली सेना रहनेछन् ।
कतारी राजा मंगलबार साँझ ५ः३५ बजे काठमाडौं विमानस्थलमा अवतरण गर्नेछन् । तीन एसियाली मुलुकको भ्रमणका लागि गत आइतबार दोहाबाट फिलिपिन्स उडेका कतारी अमिर बंगलादेश हुँदै नेपाल आउँदैछन्।
कतारी राजासहितकाे टाेली सोल्टी होटल बस्ने जनाइएकाे छ । सुरक्षामा सेनाले हवाई गस्ती पनि गर्ने छ ।
कतारी राजा हिँड्दा सडकमा अन्य गाडी र पैदलयात्रीको आवतजावत बन्द गरिनेछ ।
राष्ट्रपति रामचन्द्र पौडेलको निमन्त्रणामा कतारी राजाको भ्रमण हुन लागेको हो । पहिलोपटक नेपाल भ्रमणमा आउन लागेका कतारी अमिरलाई राष्ट्रपति पौडेलले मंगलबार त्रिभुवन अन्तर्राष्ट्रिय विमानस्थलमै स्वागत गर्ने भएका छन् ।
परराष्ट्र मन्त्रालयका अनुसार कतारका अमिरले मङ्गलबार राष्ट्रपति पौडेलसँग शीतल निवासमा भेटवार्ता गर्नेछन् ।
राष्ट्रपति पौडेलले मंगलबार बेलुका रात्रिभोजको आयोजना गर्नेछन् । बुधबार प्रधानमन्त्री पुष्पकमल दाहाल प्रचण्ड र कतारी अमिरबीच द्विपक्षीय वार्ता हुनेछ । सो वार्ताका क्रममा केही सम्झौता तथा समझदारीपत्रमा हस्ताक्षर हुन सक्ने जनाइएको छ ।
प्रधानमन्त्री पुष्पकमल दाहाल ‘प्रचण्ड’सँग भने बुधबार द्विपक्षीय वार्ता गरी केही सम्झौता र समझदारीमा हस्ताक्षर हुनेछ । उनी बुधबार बेलुका नै कतार फर्कने कार्यक्रम छ।