सातै प्रदेशको आर्थिक वृद्धि घट्यो, सबैभन्दा कमजोर बाग्मती

Share:

काठमाडौं । विश्व बैंकको पछिल्लो ‘नेपाल वित्तीय संघीयता अपडेट’ले नेपालका सातवटै प्रदेशको आर्थिक वृद्धि घटेको देखाएकाे छ । विश्व बैंकले सन् २०२३ मा आर्थिक वृद्धि घटेको देखाएको हो ।

सन् २०२३ मा प्रदेश सरकारहरूको आर्थिक वृद्धि सन् २०२० यताकै कम भएको बैंकले सार्वजनिक गरेकाे रिपाेर्टमा उल्लेख छ । कुल ग्राहस्थ उत्पादन (जीडीपी)मा आर्थिक वृद्धि सबैभन्दा सुस्त वाग्मती प्रदेशकाे रहेको छ । वाग्मतीको आर्थिक वृद्धि १.४ प्रतिशत रहेको छ ।

दोस्रो नम्बरमा मधेस प्रदेशको आर्थिक वृद्धिदर १.७ प्रतिशत छ । सुदूरपश्चिमको आर्थिक वृद्धिदर १.८ प्रतिशत, कर्णालीको १.९ प्रतिशत र कोसीको २.० प्रतिशत छ । लुम्बिनीको आर्थिक वृद्धिदर २.१ प्रतिशत र सबैभन्दा धेरै गण्डकीको ३.३ प्रतिशत रहेको विश्व बैंकको प्रतिवेदनमा उल्लेख छ ।

सन् २०२२ को आर्थिक वर्षमा आर्थिक वृद्धिदर कोसीको ५.५, मधेसको ४.६, वाग्मतीको ६.३, गण्डकीको ६.४, लुम्बिनीको ५.०, कर्णाली ५.३ र  सुदूरपश्चिमको ४.८ प्रतिशत रहेको थियो ।

थोक र व्यापार क्षेत्रमा संकुचनका कारण सेवा र औद्योगिक दुवै क्षेत्रमा मन्दी रहेको विश्व बैंकले जनाएको छ । संघीय सरकारले आयातमा लगाएको प्रतिबन्धको असरका कारण सन् २०२३ को पहिलो अर्धवार्षिकीमा प्रदेशको थोक तथा व्यापारमा असर परेको प्रतिवेदनमा उल्लेख छ ।

कमेन्ट गर्नुहोस्