केबल २० महिनामा आविष्कार केन्द्रले तयार पार्यो १० किसिमका कृषि औजार

96
0
Share:

वीरगञ्ज । तीन दशकदेखि बन्द रहेको वीरगञ्जस्थित कृषि औजार कारखाना जिम्मा लिएको केबल २० महिनामा राष्ट्रिय आविष्कार केन्द्रले १० किसिमका कृषि औजार तयार पारेको छ।

केन्द्रका सहायक मेकानिकल इन्जिनियर अरुण साहका अनुसार हाल १० किसिमका साना  कृषि औजार तथा उपकरण तयार पारिएको छ ।

धान रोप्ने सानो मेसिन, घाँस खुर्किने, ड्याङ बनाउने मेसिन, खाल्डो खन्ने हातेऔजार, आलु रोप्ने, आलु गोड्ने, घाँस तथा पराल काट्ने, धान काट्ने सानो मेसिन, प्लास्टिक ओछ्याउने र केराको फाइबर निकाल्ने मेसिन तयार भएका उनले बताए। ‘यी औजार तथा उपकरणको  मूल्य भने निर्धारण गरिसकेका छैनौँ,’ उनले भने।

इन्जिनियर साहले तीन चरणको अथक मेहनतपछि उपकरण बनाउन सफलता मिलेको बताए। केन्द्रका कार्यरत मेकानिकल इन्जिनियरहरूको टोलीले कारखानामा रहेका पुराना साना–ठूला गरेर ५५ उपकरणमध्ये ५१ वटा मर्मतसम्भार गरेर सञ्चालन गर्न सकिने जनाएको छ । हाल केन्द्रमा १५ जना कार्यरत छन्।

सरकारले २०७९ असोज ११ गते कृषि औजार कारखाना राष्ट्रिय आविष्कार केन्द्रलाईसञ्चालन तथा व्यवस्थापनको जिम्मा दिएको थियो। केन्द्रले औपचारिक रूपमा २०७९ माघदेखि काम थालेको हो ।

कमेन्ट गर्नुहोस्